76人終於都贏到今季第二場勝仗！喺上周六拆禮物日舉行嘅NBA常規賽，作客嘅76人以111:104小勝太陽；上周喺塘鵝交易過嚟嘅I史密夫（Ish Smith、藍衫）對76人嚟講，應該係最好嘅聖誕禮物，因為佢今場正選上陣就幫球隊終止12連敗嘅頹勢，將戰績改寫至兩勝30負。
眼見76人今季戰績咁差，今個月上任嘅籃球營運總監哥里哲奴（Jerry Colangelo）就停止「擺爛」策略，決定炒咗失誤多過入波嘅後衞禾登（Tony Wroten），兼且用兩個次輪選秀權向塘鵝交易I史密夫，即時增加球隊戰力。呢個變動果然有效，I史密夫今場正選上陣31分鐘，拎到14分同交出五次助攻，算得上係贏波功臣之一。佢喺賽後就話希望可以繼續幫76人爭勝：「其實我喺塘鵝今季嘅表現都麻麻哋，不過好開心今場可以幫到球隊贏波。無論之後嘅比賽係輸係贏都好，我都希望盡快同啲隊友建立默契，因為咁樣球隊會易啲贏波。」
76人教練B布朗（Brett Brown）喺賽後都對I史密夫讚不絕口：「所有人都睇到佢今場有幾活躍，佢喺第四節嘅入波可以幫球隊穩住勝局。」除咗I史密夫之外，卡蘭（Isaiah Canaan）嘅表現都唔差，佢12投六中，包括四個三分波，拎到全場最高22分。
太陽輸波折比歷素
太陽就慘喇，佢哋輸波之餘再折將，隊中得分王比歷素（Eric Bledsoe）第一節左膝受傷，打咗八分鐘就要退下火線；教練漢拿錫（Jeff Hornacek）賽後就話已經送咗比歷素去醫院接受磁力共振檢查，不過隊醫就認為比歷素應該唔係整傷阿基里斯肌腱。見到隊友受傷，朗尼派斯（Ronnie Price）都顯得好擔心：「希望大家可以為佢祈禱。無論係隊友抑或對手都好，我都唔想見到有球員受傷，希望大家可以支持比歷素度過難關。」