雷神這天憑頭場「喜威威」及第五場「連利進寶」起孖後，第六場四班1400米又係佢天下，今場雷神騎蔡廐「開心遊戲」唔用後追而前置跑均速，就此早着先鞭之下，力拒拉士如飛殺上的呂廐「駕悅」勝出，雷神又大演帽子戲法，騎師王好有機會繼續冧莊。
「開心遊戲」單Win本係大熱，臨尾回到5.2倍次熱開跑照贏，組合獨贏開A1派20.5元，四歲馬今季由1000米直路賽起步。之後逐仗加程，這天本身第三戰交到雷神手上，初跑1400米終於初嘗勝果，練馬師蔡約翰剛周三晚至憑「滿堂紅」贏夠在港900Win，轉眼間這天又有馬贏，在港頭馬總數增至901場。向來只偶然露面的蔡約翰太太，這天晒腿現身兼帶埋囡囡到場撐老公，一家三口一齊拉頭馬。
今場「駕悅」落飛影相飲恨做二奶，練馬師呂健威因此贏唔到從練第500場頭馬。三、四名由兩位停賽復出外籍騎師包辦，順序係騎「有鬥志」的巫斯義及「甜城效應」的史卓豐，四重彩派二萬三千幾。