屹立港島區多年嘅中環樓上二手書店Flowbooks噚日趁18周年營業紀念，喺半山自動扶手電梯舉辦「萬里書繩」飄流書活動，6名義工事前喺書店精心挑選有意義嘅書籍，將書本交有心閱讀嘅陌生人。接到書嘅路人如無興趣，可將書交下一個人，目標係將書一本傳一本，傳上半山羅便臣道（圖）。
Flowbooks店主樹單同八方講，店內藏書有兩萬幾本，猶如「士多」。佢認為書係流動嘅，單純嘅買賣，唔足夠衡量書本嘅價值；仲話與其叫佢做老闆，不如稱佢做書本守護者。
有時見顧客與書有緣，樹單慷慨贈書，佢強調不鼓勵送書，純粹實踐理念，等書本可以療癒最多嘅人。
面對書店結業潮，樹單都有壓力，話書店將慢慢轉營為有咖啡、飲料賣嘅合作社。