經常不平則鳴、受到高登仔熱捧嘅82歲「女神」黃夏蕙，噚日出席一個論壇講獅子山精神話當年。夏蕙BB話自己經歷過日本仔攻打香港，當時慘到連屋企養嘅白鴿都要劏嚟食，佢寄語今日嘅年輕人，要搞掂咗食飯先，唔好成日出去「搞搞震」。
夏蕙BB噚日獲大學學生組織邀請出席青年論壇，發表一下點睇獅子山精神。佢話，獅子山精神係代表不屈不撓、勤力、吃得苦。佢仲向班後生仔分享日軍侵華黑暗歲月：「我哋好慘，我都捱過，當時人人都唔敢出街，嗰時我屋企冇飯食，我哋小家庭養嗰啲白鴿都要劏埋，因為屋企一樣嘢都冇得食，打仗吖嘛。」咁辛苦捱到今時今日，夏蕙BB寄語後生仔千祈唔好令父母擔心，最重要係有孝心，讀好書行善積福，記住搵錢畀屋企開飯。
「是是非非我唔理」
至於社會事務，夏蕙BB叫班後生仔唔好理咁多，「社會太多嘢，你理唔到咁多嘅，好似我幾十歲，我乜嘢都唔知㗎，我淨係顧住行善、幫人，是是非非嘅嘢，我都搞唔掂。我亦都唔知乜嘢係是，乜嘢係非，總之嗰啲嘢我哋係唔理，總之鞏固咗自己家庭、屋企，如果屋企冇飯食，你仲係搞搞震，點搞呀？父母會擔心你㗎喎。」呢番言論，唔知會唔會令關心社會大小事務嘅「黃絲」高登仔失望呢？
李八方
mailto:[email protected]