印度第二大銀行、但喺香港得兩間分行嘅ICICI，以超過4厘嘅高息人民幣存款而聞名。不過呢樣嘢唔可以食一世，聽聞呢間嘢遲啲要本土化！
聽ICICI入面嘅口痕友話，遲啲嘅新搞作包括提款卡、信用卡，仲做埋個人貸款業務，「信用卡貸款利息好高，但拖數比率低到呢，真係好好賺，係大市場嚟」。
不過，究竟呢間印度銀行嘅主要客源喺邊度呢？好多人以為係印度人，但民政事務總署2011年數據，原來印度人係第四大少數族裔，人口唔夠3萬人，而同一時間香港嘅印度銀行有成10間，點賺錢啊？口痕友話：「𠵱家少數族裔好難喺大銀行開戶，我哋當然會照顧啦，但只係做佢哋生意，我哋都無飯食，所以，我哋要做本地人嘅市場！」