恭喜！恭喜！現年42歲的姚樂怡（Sherming）在今個月22日冬至榮升人母，誕下女兒Gaibe，體重6磅8安士。Sherming昨早在微博貼相，見Gaibe眼仔睩睩似爸爸，但尖下巴和濃密頭髮就似足媽咪靚樣，姚樂怡寫道：「Gaibe 22號出世，是個冬至baby girl，第一次做媽媽的我好興奮好緊張，這幾天在醫院又累又忙，但有BB陪我們度過第一個聖誕好難忘好開心！我們昨（前）晚回家了，BB睡得好甜！」昨日郭少芸親到樂怡家探望B女。
老公陪產拍片
Sherming昨日在電話中透露提早兩星期分娩：「因為開刀通常都係38周左右，都幾攰，𠵱家BB瞓緊。」第一眼見到BB有甚麼感覺？她說：「好感動，產房姑娘抱過嚟，其實好攰唔係好郁到，錫咗佢兩啖。」Sherming透露老公吳俊匡（Alan）有陪入產房兼拍片，她說：「有呀，五日四夜同我一齊瞓，但大家都未睇片，囡囡英文名叫Gaibe，中文名諗住搵人改，唔使跟家族字輩。」樂怡笑指囡囡是為食BB，因為分娩後頭幾天未有足夠奶水餵人奶，所以B女有食奶粉，樂怡表示會好努力餵人奶。問她對BB有甚麼期望？她說：「冇㗎，健康就好開心。」老公是否好開心？Sherming笑言：「佢直頭冧滋滋，爭住抱，『等我嚟啦』咁樣。」會否追多個囝囝？她說：「都想追多個仔，一仔一女最完美，但老公都鍾意女，因為夠嗲。」
好多人擔心BB同寵物好難共存，而Sherming家中有兩隻分別11歲的Money和12歲的Momo的狗狗，問狗狗會否呷醋？樂怡說：「Money有少少，因為一向佢最得寵。開頭抱BB返屋企，佢哋淨係知多咗個人嚟瞓，後來發現BB喊，我抱住BB時，佢哋就會走嚟聞吓。𠵱家有工人姐姐照顧狗狗，陪月姐姐就幫手照顧BB，所以唔擔心。」
採訪：嵐山