勇士嘅當家球星「咖喱仔」史堤芬居里（Stephen Curry）（圖）除咗喺上周六當選2015年美聯社最佳男子運動員之外，上周五勇士對騎士嘅聖誕大戰都吸引到勁多美國人睇；如果話佢係美國體壇最受歡迎嘅新星，相信大家都唔會有異議。
《美聯社》喺上周六公佈，上季帶領勇士贏到總冠軍嘅咖喱仔，當選今年嘅最佳男運動員；佢亦都係繼「小鳥」布特（Larry Bird）、「波神」米高佐敦（Michael Jordan）同「大帝」勒邦占士（LeBron James）後，第四位贏到呢個獎嘅NBA球員。呢個獎應該都係咖喱仔最好嘅聖誕禮物，因為咁代表佢得到美國體壇嘅認可。
咖喱仔憑住百步穿楊嘅三分波俘虜咗成班球迷嘅心，勇士嘅比賽自然多人睇。據美國傳媒報道，只係喺美國，就已經有1,100萬人睇勇士對騎士嘅聖誕大戰轉播，亦都係近四年收視率最高嘅聖誕大戰；上年大帝重返老家騎士倒戈熱火嘅重頭戲，收視率都只係得930萬，比今年足足少咗17%！