噚日西九「自由約」同換物平台「執嘢」合作，搞咗個「後聖誕執禮物大會」，呼籲市民減少浪費，將屋企唔要嘅好東西拎出嚟交換。八方望過吓，衫褲裙鞋、樂器、玩具、枕頭、杯、電話殼乜乜乜……真係應有盡有！
換物會流程規定市民要先將自己唔要嘅物品交到接待處，由工作人員篩選，再裝入個藍色袋，拎到帳篷底等大家執走。個藍色袋好有魔力㗎，每次工作人員拎住佢，就會俾啲凌厲目光贒實，袋入面嘅好東西一出籠，即刻就俾人執走，「咋」一聲冇晒。雖然大會規定唔准拖車仔嚟，不過唔少大叔大嬸少理，照拖車仔嚟「掃貨」，裝到盤滿缽滿。
第一次去換物嘅歐陽小姐就同八方投訴，話班人「根本係搶」，自己好後悔帶嘢去交換咁話喎；方小姐就覺得個場嘅舊物好立雜，最後一件嘢都冇拎走。不過做製衣嘅容先生帶咗十幾隻舊VCD同衫去，成功換到部玩具足球機畀姪仔；袁小姐就以衫換裙，佢希望坊間多啲搞吓換物會，減少浪費。
「執嘢」負責人胡文珊話，次次換物會都見到有貪心嘅人嚟執好多嘢走，連工作人員都認得佢哋，要善意提佢哋唔好拎太多，佢話惟有希望市民執完件嘢返去真係有用啦。