噚日一個青年論壇上，《主場新聞》創辦人之一劉細良同民主思路嘅湯家驊（圖），竟然以「淘寶」論政。
劉細良話，淘寶話畀全世界聽，「要接受乜嘢為之中國標準」，話網民既然用得30蚊買件波衫，就要預咗洗衫時會「洗甩字」，預咗質素有問題。
細良話，世界有一套標準，中國亦有自己一套標準，「你要習慣、適應中國嘅標準，等於你喺淘寶買嘢，唔好當佢真係H&M……千祈唔好做真心膠，你要知道自己買緊假嘢。」
民主思路召集人湯家驊主動為淘寶平反，話自己早前淘咗套音響，係法國名牌嘅五分一價錢，膽機係中國製造，聽過係靚聲。
劉細良即時插口︰「會唔會爆炸㗎？」湯家驊又話，早前淘過一部日本製原裝相機，價錢比起出面平兩成，藉自己嘅淘寶經驗叫大家唔好以偏概全，認識每件事物嘅好壞。
湯家驊以一段婚姻比喻中港關係，話婚姻出問題，雙方都有責任，佢話創立民主思路就係要做婚姻輔導員，希望挽救呢段婚姻。