練馬師告東尼與太太、「牛精好友」馬主王永強一家、「萬事盛」馬主伍燕梅等人，近日飛咗去新加坡過聖誕兼慶祝告仔生日，所以一連幾朝都不見告仔在沙田晨課出現。告仔就玩得開心，不過今日拆禮物日(26日)，東廐發生一件唔開心的事，就係旗下「幸運健將」在內圈操練時肩膊骨突然斷裂，即時被人道毀滅。
66分的「幸運健將」是兩歲愛爾蘭自購馬，在外地兩戰1200米獲一冠一亞，本月20日才開操，估不到開操7日便死亡。
因為死馬事件，移離屍體需時，今朝內圈封閉了半小時之多，許多原本打算在內圈加課的戰馬，都被迫轉移陣地，改在大圈加課，包括高伯新馬房多駒「妙感」、「王者無敵」等。
「幸運健將」馬主梁文鴻有匹團體馬「幸運戰略」本月19日由韋達策騎出賽，陣上狂流鼻血，血液染到韋達一褲都係，該駒亦隨即退役，梁文鴻一周左右損失兩駒，可謂十分黑仔。