周六舉行嘅NBA常規賽，太陽將會喺主場迎戰76人。不過，兩軍今場陣容都應該有所變動──太陽有馬基夫莫里士（Markieff Morris）俾球會罰停賽，而76人就向塘鵝交易到I史密夫（Ish Smith）。（now635台明日10:00am直播）
莫里士掟毛巾內部停賽
太陽近六場輸足五場，仲有前鋒馬基夫莫里士周三喺不敵金塊嘅常規賽不滿教練漢拿錫（Jeff Hornacek）嘅調動，竟然向後者掟毛巾，結果俾球會罰禁賽兩場，佢將會缺陣周六對76人同下周一對騎士嘅比賽。莫里士事後已經喺twitter道歉，聲稱自己只係一時衝動，掟毛巾只係想顯示心情有幾差，並唔係有心攻擊教練。
至於76人今季錄得1勝30負，差唔多每項「史上最差」嘅紀錄都有望挑戰；不過，球隊管理層已經睇唔過眼。哥里哲奴（Jerry Colangelo）今個月上任籃球營運總監後，即刻決定改變「擺爛」策略，用咗兩個次輪選秀權向塘鵝交易控衞I史密夫，希望加強球隊即戰力，同時炒咗今季失誤仲多過入波嘅後衞禾登（Tony Wroten），希望終止12連敗頹勢。
