特首梁振英前日喺北京見發改委副主任何立峰嗰陣，傳媒話佢當時用「同志」稱呼對方，八方同事睇番現場條片，睇到特首旁邊嘅新聞處處長聶德權露出奇怪嘅表情，不過處長噚日專登向八方澄清咗，話佢當時聽到同理解特首係講「官員同事」，冇聽到「同志」，所以佢係冇感到任何奇怪！不過，本港傳媒搵嘅國家語委普通話水平測試一級老師證明CY係講「同志」，連內地官媒《環球時報》都大字標題CY「首次稱國家官員為『同志』」（圖），仲有好多內地網民讚好㖭！唔知特首辦會唔會寫信畀《環球時報》澄清呢？