2015年真係好多藝人結婚，先講兩個童話式嘅婚禮，周杰倫同昆凌就喺英國嘅教堂行完禮，再去古堡開party。黃曉明同Angelababy就喺上海舉行婚禮，仲將個場地搞到成個古堡咁。
有豪華婚禮，都有慳皮婚禮，王祖藍同李亞男，佢哋無論係婚紗、禮服、結婚、珠寶、餅卡、喜帖計設、回禮都有贊助，呢個婚禮真係慳唔少。
有啲新人就有由細識到大，好似由青梅竹馬拍拖分手拍拖分手，撻完樂仔再翻撻，吳雨霏最後都係情歸「網球王子」洪立熙。復合再攜手展開人生新頁嘅，仲有張嘉兒同老公Nathan，徐天佑同老婆仔Olive，本身係中學同學，都係8年前重遇先至拍拖架咋。
除咗識咗好耐結婚，都仲有人係識咗唔係好耐就結婚，胡杏兒年頭認拍拖，年尾就嫁金融才俊男友Phil，由單身到榮升人妻，一年就搞掂喇。何嘉莉就仲勁，上年離婚，今年就再婚。
有啲藝人就唔畀人跟爆結婚，選擇咗自爆，好似有王菀之、伊能靜、吳奇隆、周渝民等等…
藝人對慣鏡頭，不過另一半就未必係嘅，好似葉翠翠老公咁，就唔接受訪問，齋出嚟影相就已經好好。古巨基太太就連相都唔影，最後只係發相畀傳媒。