今日是Boxing Day，禮物開估時刻，你可能有如下發現：
律政司度身訂做給港豬的禮物，唔使打開都知，叫做「全心全意，一地兩檢」。你唔想要，但可以跟誰交換？地球上還有咁蠢的人會接受這份「大禮」嗎？
建制派議員打包送給市民的禮物，是一份剪爛晒的，一眼就知，是網絡23條。而負責速遞的公司擺明滾你，說個包裹正常唔會中招，等你簽收後打開，即場告你，不誠實使用電腦！聖誕快……落網！
假傘兵送給選民的禮物，是一把鎅刀，就是說，他們依然會在明年立法會選舉時鎅票，自己地頭自己救兼夾唔鍾意鎅手而追求慢活的你，肯犧牲配合嗎？
林鄭很大方，主持欣賞香港活動大抽獎，頭獎大禮就是她那個天堂留定了的位。忽然天堂讓座的解讀有很多，最大機會是，她想做港版蔡英文，與其天堂留座，不如神壇留位。官到無求做總統，懂了。
拆開這份禮物時，你要諗吓，由西九坐高鐵去唔去到天堂站？天堂總站，使了上帝幾多個億？有無封頂？你個位隔籬，是不是坐了黐線的蔣X暈？