聖誕節係西方社會嘅大節日，英超習慣拆禮物日有比賽招待球迷，西甲、德甲等其他歐洲主流聯賽，就歇冬畀職球員舒舒服服過節，好似皇家馬德里前鋒基斯坦奴朗拿度（C朗）就去咗開P，拜仁慕尼黑教練哥迪奧拿就回鄉，英超球員高人工啲，就唔好葡萄咁多啦。
C朗私人機飛美國開P
因為舉行明年歐國盃決賽周，西甲嘅歇冬都相對縮短，下周三聯賽就重開，不過「派對動物」C朗點都唔放棄呢個機會，日前已經飛咗去美國邁阿密，過一個陽光海灘聖誕節，之前睇NBA比賽，最新就上載同老友開P嘅相，佢都識氹吓粉絲，挨住梳化留言：「聖誕快樂，粉絲們，我愛你。」不過唔係每個球員都好似C朗咁有私人飛機，短短幾日就無謂飛嚟飛去，好似皇馬後衞比比、中場占士洛迪古斯都留喺馬德里，簡簡單單同家人過聖誕都好開心。巴塞剛剛喺日本贏完世冠盃，畀球員自由度就大啲，碧基留喺日本過節、中場拿傑迪錫就同老婆囝囝飛去瑞士，滑雪過聖誕。
德甲意甲歇冬期長啲，球員就梗係更多節目，首次過德甲歇冬嘅利華古遜前鋒查維亞靴南迪斯（小豆），就同女友去滑雪，仲上載鬼馬合照相，不過有曼聯球迷就留言，話曼聯宜家好需要佢，希望佢回巢，唔知會唔會影響小豆心情呢？另外，外借去羅馬嘅阿仙奴門將施捷斯尼，就同女友喺羅馬食浪漫晚餐，同女友攬住成個連體嬰咁，真係甜到漏。
唔單止球員，連教練都趁聖誕假輕鬆吓，教埋今季就離開拜仁慕尼黑嘅哥迪奧拿，就返去巴塞隆拿市過節，仲吸引唔少球迷「捕獲」，佢下一站就未確定，不過離唔開曼城、曼聯同車路士英超三強，德國傳媒仲話，佢去邊間球會，新東家都會畀至少4,000萬歐元（約3.4億港元）佢，向拜仁買番啲子弟兵，特別係中場堤亞高艾簡達拿。