立法會喺聖誕期間休會，唔少立法會議員都趁機唞唞，雖然聖誕節係西方產物，但唔少愛國愛港建制派中人都不忘趁機做吓個人宣傳。除有思嫣BB用「尖面」自拍相做聖誕祝福，民記議員「元秋」蔣麗芸、陳恒鑌亦將自己副尊容key上聖誕服飾送賀網民，不過民記主席李慧琼喺facebook賀聖誕，就似乎辣㷫網民被洗版狂轟！
琼子喺fb留言話，聖誕願望係香港社會回到正軌，議會回復理性討論，將令人「不安」嘅政治生態趕走，點知惹嚟近千個網民留言，幾乎全部都係鬧民記幾衰幾無恥，好似有網民鬧「好惡心，故作溫情，慳啲啦，賣港賊DAB」。反而佢師傅曾鈺成一樣喺fb賀聖誕，但近百個留言，大部份都正正常常。