送畀冇睇過《星球大戰》嘅你：
聖誕節難得放假都想搵部戲睇吓，今年《星戰7》強勢回歸，全城鬧得熱哄哄，個個黑武士上身，奈何你冇睇過《星戰》，又唔想夾硬使百幾蚊，嘥兩個幾鐘時間去趁墟嘅話，不如考慮以下幾套電影啦！
同男友／女友睇：
《紀念日》 優先場
《星戰7》隔咗十年先有呢集，《紀念日》 都係十年，不過係紀念葉念琛拍咗愛情片十年呀！葉念琛愛情片有咩好睇？至少你男友／女友睇完後，會將怨氣轉而咗喺鄧麗欣／方力申身上，變相減少咗對你嘅不滿吖嘛！
同屋企人：
《葉問3》
雖然知道葉問贏硬，但有世界重量級拳擊手泰臣壓陣，張晉又會同葉問以詠春對決，加上今集佢同老婆張永成有感動位，係穩陣之作。
《谷家大鑊過聖誕》
好多時至親嘅屋企人先最有距離感，有問題唔緊要嘅，佢哋四代同堂一齊拆掂佢。
同小朋友：
《小王子》
講一個小妹妹讀書好大壓力，遇到一個啟發到自己嘅鄰居伯伯，之後再穿插《小王子》小說內容，諷刺現實社會嘅故事。粉絲應該入場睇吓改篇版《小王子》。
《史諾比：花生漫畫大電影》
史諾比第一次跳到大銀幕，搵嚟《冰河世紀》班底製作，不過劇情真係只適合小朋友睇。