灣仔會展「香港冬季購物節」開鑼！以往多數買家庭用品一類東西，不過據知今年有黃金腦場商舖玩亂入，如果大家唔知道，可能會Miss咗掃平Gadget產品機會；會場內所見，劈價最強會是Win 10平板電腦，價錢好多都做緊黃金內最底價，入去買仲有一個原因，因為買指定的PiPo、台電、馳為及WMP平板電腦，仲會多送一張TOSHIBA 32GB microSDHC卡，read/write速度都去到48MB/s，插返入Win 10平板電腦度內，部機容量即時大增。
當中最搶眼係有平價Surface之稱的--WMP TF101A（原價$2,699/特價$999），此機呢期在黃金場內極具話題性，機身設計有點似Windows Surface系列，將平板插上Keyboard或合起來時，都是以強力磁鐵結合，使用上好方便：規格上最搶眼之處，是使用了10.1吋IPS芒（1,280 X 800），雖然解像度未及全高清，但若果只是用作流動文書電腦，在應用上絕對夠用有餘；其他硬件規格包括Intel 1.83GHz四核心處理器、2GB RAM、32GB ROM，再加上最新Windows 10操作系統。
台電X80HD（原價$799/特價$699），着力搶攻「平價位」平板路線，以$699價錢，玩到差唔多WMP TF101A一樣規格，例如處理器行Intel 1.83GHz四核心、2GB RAM及32GB ROM，稍為輸蝕係屏幕只有8吋（1,280 X 800），同少咗個Keyboard，否則可同WMP完全睇齊；不過佢獨到之處是使用了Win10+Android雙系統，如果是找「板類」產品，絕對值得留意。
喜歡玩靚芒的，台電還有一部X98 Air 3G（原價$1,799/特價$1,399），處理器雖然一樣行Intel 1.83GHz四核心、2GB RAM，不過ROM卻加大至64GB容量，不過最強還是佢個芒，行9.7吋Retina IPS，解像度達2,048 X 1,536，而且機身還內置有SIM卡插槽，可以直插3G卡上網。
查詢：迅達（灣仔會議展覽中心新翼Hall 1C 1R06/1R08）
記者：朱崇德