求驗客手記：倫敦雙雄「童」樂日

聖誕快車開始前，倫敦雙雄阿仙奴同熱刺周三先搞小球迷派對，安排球員同一班小球迷聯歡。講星味就熱刺強啲，派出當家前鋒哈利卡尼、雙翼孫興民同拉美拿，同小刺迷玩遊戲。

至於阿仙奴就喺室內場搞咗個大型吹氣遊樂場，有彈床同籃球架玩，阿迪達、哥林張伯斯都有同小朋友互動，最開心係養傷嘅「山神」阿歷斯山齊士都有現身，自然成為小球迷捕獲目標啦。