雲高爾發火，真係非同小可，喺前日記者會，呢位曼聯領隊黑起塊面，滔滔不絕，狂鬧班記者五分鐘，插傳媒無中生有，寫衰曼聯，最後拂袖而去，充滿霸氣。我求大俠希望聽日隊曼聯都踢出呢種霸氣，贏到史篤城啦！
英國傳媒呢幾日吹到雲高爾就嚟被炒，摩連奴勢將接班。喺英國時間星期三下晝，雲帥出席賽前記者會，首次回應帥位垂危嘅傳聞，佢望住一大班體育記者，靜咗一靜，冷冷咁講：「喺呢間房入面，有冇人覺得應該向我道歉？真係冇人咁覺得？真係令我震驚。」佢停咗一陣，繼續鬧人，「睇你哋嘅報道，我以為自己已經被炒。你知唔知你哋寫嘅嘢對我太太、仔女、孫仔孫女、曼聯球迷同朋友有咩影響，佢哋係咁打畀我，連雲格都要回應。你覺得我仲想同你哋班傳媒講嘢咩！唔係英超規定，我絕對唔會喺度出現。」
雲高爾話佢同球員開咗會，仲舉行咗聖誕午宴，全隊一條心，有信心一個月後上返榜首。有記者問，曼聯咁大間球會，有啲傳言係咪難以避免，結果又惹起雲高爾把火，「唔係，你哋記者應該根據事實去報道，費格遜、大衛基爾同活華特都打電話關心我，就因為你哋作嘢，作埋啲毫無事實根據嘅衰嘢。」最後，雲帥同記者講聖誕快樂，就結束歷時4分58秒嘅記者會，嬲爆爆離開。
朗尼：全力撐雲帥
英國《太陽報》就喺周四反擊，大字標題向雲高爾「道歉」（圖），「我哋好抱歉，你哋六場不勝；我哋好抱歉，你哋歐聯出局；我哋好抱歉，你已經使咗2.5億鎊。最抱歉嘅係曼聯球迷，雲高爾仲未被炒。」寸到暈！
講到英超領隊喺記招發火，雲高爾當然唔係第一人（見附表），前魔帥費格遜向來同傳媒關係麻麻，以前有記者質疑華朗係水貨，激到佢當眾爆粗，趕記者出訓練基地。隊長朗尼周四受訪，就話全隊一條心會為雲高爾而戰；曼聯喺拆禮物日作客史篤城，睇吓班球員會唔會咁好火啦。
