陳敏之舊年創業賣曲奇，短短一年分店越開越多，𠵱家已經開到第五間，佢希望嚟緊餅店可以衝出亞洲，遠至歐美都可以買到佢嘅曲奇。聖誕新年係送禮旺季，老闆娘就話銷情理想，不過馮仁昭發現佢開喺太古城間分店，咁啱得咁蹺，謝霆鋒間「峰味」曲奇最近就開正喺隔籬。兩間都係藝人開嘅，兩間同樣賣特色曲奇，似有打對台意味。
「生意好咗」
馮仁昭噚日就打電話畀敏之，佢話唔單止唔覺得係惡性競爭，仲話霆鋒間舖喺隔籬，生意反而好咗。敏之話：「我真心欣賞霆鋒，佢係生意奇才，而且亦都食過佢嘅曲奇，好有特色亦好好食，其實每個行業都有人做同樣嘅嘢，我同霆鋒雖然都係做自創口味嘅曲奇，但係大家嘅包裝都各有特色，而且有兩間曲奇餅店開喺一齊，反而帶旺嗰一帶，人流多咗，生意仲好咗。」問到霆鋒開分店，都跟她開喺同一地點，會否覺得自己揀舖有眼光。敏之即講笑話：「哈哈，我揀舖都幾有眼光㗎，其實可能因為太古城自成一國，又多人住，買嘢方便，所以大家先會諗到喺呢到開舖！」
聖誕過後，陳敏之透露將會準備一系列農曆新年禮盒：「𠵱家研究緊海鮮味嘅曲奇，可以襯番新年氣氛！」
撰文：馮仁昭