雷神第三場贏蘇偉賢馬房的「財神」做完大熱保衛者後，第四場四班一哩，轉做落飛黨甜心，佢騎落飛馬苗禮德馬房的「珍珠旺」12檔起步，留到最後200米後追一攻而破，5.1倍綠燈Win順利開出，落飛黨收到肚滿腸肥，當佢神咁拜！
值得一提，雷神季內暫時騎過三匹12檔馬跑谷草，交出一勝兩位百分百上名，數據突出。今場「珍珠旺」組合獨贏屬A2選項派21.5元，「珍珠」系馬亦告打開今季勝門，馬主陳明榮當然開心。賽後巨胸警訊之花Heily馬溱禧亦有拉頭馬，她這晚玩密實封胸，但仍激突，十分風騷。
有冇騎師荒都好，雷神都係咁贏馬，不過近期有多位洋將停賽，令佢進一步坐大卻係事實，淨係睇佢截至此場，近三戰狂數11Win就知。至於苗禮德上周六沙田日賽「心花怒放」同「大將風馳」起冷孖已冇現身，原因一如往年返咗祖家南非避寒，話雖如此，佢馬房這晚繼續發炮，並增添一場頭馬。
今場直路初一對灰馬「銀飛龍」同「疾如風」走甩咗，眼看可以包辦大冷Q，臨尾至畀「珍珠旺」搞垮，最終老馬「銀飛龍」第二，後生馬「疾如風」則在港初次上名跑第三，第四名「信是有緣」出自李寶利手筆，四重彩派六萬八千幾。