好多人都話做中層員工就最大鑊，因為上要湊老闆，下要𠱁馬仔，有時真係裏外不是人。小弟只係低層員工，過住日日靠打字寫文章、賺少少錢過活，就未體會到嗰種困難。不過，相信摩連奴、雲高爾（圖）呢啲教頭就好有共鳴。
雖然呢班領隊人工高，但都係中層打工仔一個，上要湊班主，下要睇住班球員嘅面色做人。中層正常就高人工過低層，但你做領隊，分分鐘有一半手下都高人工過你。假如人工係同能力、仲有喺老闆心目中嘅地位成正比的話，你呢個中層領隊嘅地位可能仲低過啲球星。最弊嘅係，大家嘅人工唔係秘密，唔單止球員知你人工幾錢，就連全世界都知，咁試問你喺更衣室又有咩權威？又點壓得住班球員呢？前曼聯領隊費格遜深明此理，佢喺本新書入面講過，以前教曼聯嗰陣，佢要格拉沙家族承諾，唔可以有球員嘅人工高過領隊，就係要維持呢種「階級觀念」。
𠵱家球壇越嚟越多球員兵變，搞到領隊下台，就好似啱啱摩連奴被炒，佢就聲稱話被球隊背叛。喺呢件事上面，有人撐領隊，覺得班球員冇職業道德，專登踢得衰嚟逼走阿頭；亦有人撐球員，覺得成隊球員都反一個領隊時，嗰個領隊肯定有好大問題。小弟個人覺得呢個係足球商業化嘅結果，以前球隊賺錢，淨係靠成績，所以領隊好重要，但𠵱家球隊除咗踢出成績賺轉播費，就係靠球員賣波衫、拍廣告、拉贊助，球員嘅商業價值非常高，幫球隊賺錢嘅能力高過領隊，帶動球員地位上升，結果出現𠵱家球員地位凌駕領隊嘅現象。
文：咖喱