水浸眼眉嘞，究竟出名硬頸嘅雲高爾肯唔肯變呢？英國傳媒披露，曼聯領隊雲高爾日前同班球員開危機會議，以朗尼為首嘅本土幫，同埋以桑馬達為首嘅西班牙幫齊齊投訴，要雲帥改變管理、訓練同戰術三方面嘅保守固執風格。雖然雙方最後傾掂數，會同心協力幫球隊渡過難關，但以雲高爾份人，我求大俠就唔係幾信佢會改變自己奉行多年嘅一套嘞。
本土幫狠批辛苦兼死板
曼聯上輪主場以1:2不敵諾域治，連續兩場聯賽輸畀升班馬，跌出前四，雲高爾帥位垂危。英國《每日郵報》報道，𠵱家係雲高爾上任紅魔主帥以來，更衣室士氣最低落嘅時候，所以雲帥日前召開危機會議，同班球員傾吓點扭轉劣勢。雲帥話開誠佈公、真心交流，叫球員盡情表達意見。隊長朗尼、副隊長卡域克同埋基斯史摩寧三位本土球員最多聲出，佢哋可謂全方面批評雲帥，認為雲帥嘅訓練太辛苦、管理太嚴格同埋戰術太死板，希望雲高爾可以改善吓。
狂牛幫埋怨轉位難適應
曼聯球員認為，今季傷兵數字持續高企，都係因為過量訓練，搞到球員太攰、容易受傷。除咗本土幫，桑馬達同埋安達靴里拉兩位西班牙兵亦踴躍發言，佢哋好想入選國家隊，幫西班牙出戰明夏嘅歐國盃，但雲高爾成日將佢兩個嘅位置變嚟變去：好似馬達咁，有時踢中路，有時踢邊路；靴里拉就有時踢攻中，有時就踢防中，搞到佢兩個無所適從，影響場上表現同入選國家隊嘅機會。領隊同球員最後達成協議，會全心全力備戰拆禮物日作客史篤城場關鍵戰，雲高爾亦會加強同球員嘅溝通。
對曼聯高層嚟講，佢哋都唔想炒雲高爾，最希望雲帥可以搞得掂，撥亂反正，最近CEO活華特同班高層去開會，都係傾吓啲商業合作，冇傾炒領隊。不過，我求大俠就對雲高爾呢個危機會議嘅承諾有保留，喺今季季前，朗尼同卡域克已經同佢講過呢啲問題，但呢半年嚟，雲高爾都冇改過。再睇番雲帥教巴塞隆拿、拜仁慕尼黑嘅前科，真係唔覺佢係個從善如流、聽球員意見嘅人。