呢排曼聯炒雲高爾以及請摩連奴加盟嘅傳聞，成為英超球迷討論熱話，仲傳話摩佬肯減薪一半以達成過檔曼聯嘅協議。不過摩佬嘅經理人文迪斯就走出嚟降吓溫，話佢哋仲未同曼聯有正式接觸同達成協議：「截至𠵱家我哋都冇同曼聯進行過正式會面，當然將來會發生咩事大家都唔知。」未正式傾，咁會唔會私底下已經有非正式傾過呢？另外亦有傳一旦摩佬入魔，第一簽將會係曾經同佢喺國米合作過嘅荷蘭中場史奈達。
那邊廂車路士暫代領隊軒迪克，繼續為26號佢回歸後首場比賽而積極備戰。雖然踢完拆禮物日主場對屈福特場波，兩日之後就有作客曼聯場大戰，但軒帥依然好識做，畀班球員喺26號場波後各自返屋企陪家人，第二日再備戰。摩帥之前被炒，估計好大原因係同班球員反晒面，軒迪克收買吓人心先都係上策。不過佢老人家都有威嚴一面，周三記者會就叫球員照吓鏡，反省吓上半季點解打得咁差。