35歲方力申(Alex)與32歲鄧麗欣(Stephy)戲裏戲外相戀十年，由地下情到近年正式公開關係，情侶檔已「被升呢」，傳出過無數次秘婚消息。這對老夫老妻為宣傳新片《紀念日》，受訪時攞正牌打情罵俏，人前鬥鬥氣、頂頂嘴，默契爆燈。
統籌：林妙萍
造型及撰文：趙潔恆
攝影：郭賢興
化妝：Cyrus Lee (鄧麗欣) 、Yen Lai (方力申)
髮型：Vince Pang @Il Colpo Platinum assisted by Euling Chow
Alex與Stephy最近為葉念琛執導、下周四正式上映的《紀念日》四出宣傳，連聖誕節都要在工作中度過，Stephy說：「真係好想過一個白色聖誕節，去歐洲感受氣氛，不過今年都冇機會喇！」幾忙都好又會否交換禮物搞小驚喜呢？Alex此時流露古怪神情：「日日都由朝做到晚，邊有時間買呀，我問你你都係咁答㗎啦！」見Stephy苦笑，Alex即刻補飛：「不過咁講，我通常之後又會買番份小禮物送畀佢。」
為個煲嘈交
新片中二人上演多場火爆嗌交戲，拍攝期間都盡量少見，免影響情緒。現實中的他們一吵架就多數為瑣碎事，「真係啲小事，都唔會記得為乜而嗌，如果最深刻就只記得第一次嗌交係為咗隻碟同個煲，嗰次佢都有落台講對唔住，𠱁番我嘅，但之後好似都冇試過喇。」Stephy乘機投訴。Alex不甘示弱：「其實多數都好似係我𠱁番你先，又或者扮冇嘢先。」「你可以扮冇嘢，我唔得囉！」火藥味慢慢散滿影樓，Alex卻笑笑口：「如果唔扮咪繼續僵落去，好彩我都幾識扮嘢箒。」以為Stephy就此作罷，誰知氣還未下。講起二人對浪漫的看法，Stephy就借題發揮，「浪漫真係好簡單，如果有人喺嗌交之後𠱁番我就係㗎啦。」舌劍唇槍一來一回，上演鬥氣真人騷。
未傾過婚期
Alex與Stephy由十年前拍攝《獨家試愛》， 之後的《十分愛》 、《我的最愛》 ，到最新的《紀念日》，演活不少戀人與夫妻的實況，Alex卻直言未受電影的戀愛觀影響；「拍套套葉念琛嘅戲我都唔係幾認同佢嘅愛情觀，好似呢套係講夫妻沒完沒了嘅戰爭，我都唔同意嘅。戰爭即係要有一方一定要贏，但係兩公婆又唔係咁計嘅。」十年前後，二人的角色變成熟了，戲外的他們也一同成長，Stephy說：「我以前會見步行步，好被動，但呢幾年會諗多啲將來，同埋主動去爭取更多機會。」那未來的計劃中有結婚一步嗎？Alex連忙擋駕：「我哋真係冇傾過，都係大家訪問時單刀直入問，我哋先會講吓。」二人全程互相頂嘴，終於同聲同氣於婚期話題上落閘，夫唱婦隨。
隨你二揀一
Alex同Stephy受訪時一唱一和耍花槍，分開作答A與B選擇題，他們又能否心意相通？
A. 食燭光晚餐 B. 食茶記
Alex：梗係食茶記啦！食燭光晚餐淨係得兩個人，食茶記可以一大班朋友。
Stephy：我揀燭光晚餐，應該係兩個人食好浪漫。同埋我食嘢好慢，食茶記感覺要好趕。
A. 交換禮物 B.交換秘密
Alex：交換禮物啦。話明係秘密邊有得交換㗎！
Stephy：如果係秘密，應該係唔想講出嚟，所以開開心心交換禮物算啦。
A. 直升機接新娘 B.巴士接新娘
Alex：巴士接新娘背後應該有個動人故事，直升機接新娘咪淨係上報紙。
Stephy：巴士接新娘幾特別，未見過咁大架車接新娘，又可以載多啲親朋戚友，應該幾難忘喎！
更多精采時尚內容，盡在 http://add.appledaily.com 。