臨近年尾，好多公司陸續趕尾班車在港上市，噚日就有間個名好鬼長嘅公司掛牌，之唔係中盈盛達（1543），sorry，呢個只係縮寫，佢全名係「廣東中盈盛達融資擔保投資股份有限公司」，足足有18個字！
中盈盛達其實係廣東省嘅融資擔保服務供應商，主要向中小微企業提供以信用為基礎嘅融資服務，滿足中小微企業嘅融資與業務需要。
中盈盛達唔止公司名長，連送畀港交所（388）嘅紀念品，都特別長過人。噚日董事長吳列進將份紀念品交畀港交所代表，遠睇仲以為係隻龍船，近望先知係「九龍如意」，公司方面話，此乃寓意富貴吉祥，風山水起。呢隻新股噚日亦力保招股價，雖然潛過水，但收市上番水面。