港女聖誕有咩節目？係咪一定狂買狂食？靚女OL Carmen 話自己鍾意high tea鍾意到出晒名，但今年聖誕，有更重要嘅任務等緊佢。
採訪：黃芷蔚 攝影：廖達燊 、馮峰
「放工後我係《星球大戰》一個角色，有個使命，就係我哋唔可以收取任何利益咁去幫人。」Carmen鍾意《星戰》16年，一直都係獨「毒」，直至網上遇到班鍾意cosplay嘅朋友，一齊成立組織「The Rebel Legion Hong Kong Base」。「其實冇限港女就鍾意下午茶，港女都可以鍾意《星戰》，玩cosplay，有人影相或欣賞你裝扮，但同時間你又可以做啲有意義嘅事。」佢指入得會，就要cosplay住做《星戰》 角色做義工，每個角色嘅全副裝備都要向美國總會申請，得到認可先有資格出席活動，不過唔少人因為冇時間、花費太大等等原因而卻步，「其實好多人都鍾意我哋嘅costume，覺得好靚，但整好後佢唔捨得着。」
當日扮演《星戰7》女主角Rey嘅Carmen，連同黑武士、白兵、同絕地武士到醫院探訪，絕地武士（jedi）Jack就覺得cosplay義工俾佢好大滿足感，「佢哋覺得真係一個電影角色嚟探佢呢，眼神入面流露嗰種喜悅，同你普通做義工唔同。」負責扮黑武士（Darth Vader）嘅義工阿航，一路配帶緊黑武士各樣裝備，一路憶述自己探訪小朋友嘅情形：「通常啲阿爸阿媽見到我就嗌：『嘩黑武士呀！』即刻抱起個B話：『影張相影張相！』跟住個B就喊喇，好在我哋有好多角色，我整喊咗人，有Carmen呢啲靚女可以氹返人地。」
放低面具，其實佢哋都係普通市民，幾年間嘅相處，已經熟到似屋企人，「我哋有隊友會結婚，我哋會變成《星戰》主題婚禮。」但Carmen就笑指冇嘢阻止到佢呢個興趣，「我唔會揀啲唔鍾意我cosplay嘅男友，如果有一日我屋企人或另一半唔鍾意我cosplay，其實都唔會阻止到我。」
鳴謝：The Rebel Legion Hong Kong Base
場地提供：香港映畫House One