太陽娛樂文化老闆周焯華(洗米華)，近日為處理家事，忙得不可開交。世紀一拖形同向外間確認Mandy Lieu名份，洗米嫂Heidi(陳慧玲)亦對洗米華死心，決定離婚。
日本之旅轉眼就完，洗米華今早已返港；咁Mandy呢？雖然已經離港，但故事未完。
據接近洗米華嘅知情者透露，洗米華會同Mandy先返倫敦、接埋6個大嘅囡囡，之後一行三人坐私人飛機出埠過聖誕及元旦，B女更會首次飛去旅行。而今次，亦可以話係世紀拖手之後，進一步確認Mandy母女名份。如今Heidi既已決定離婚，洗米華更加冇晒包袱。
昨晚十點半，先見到Mandy一個人先於香港國際機場一間coffee shop，一邊睇書一邊係咁WhatsApp，面前仲有碟意粉添。見佢仲係用緊iPhone5，未換新機。
一邊篤WhatsApp一邊等嘅Mandy，等到十一點左右，終於見到由澳門出發返港嘅洗米華抵達機場。Mandy即起身埋單去15號閘口會合洗米華，洗米華入禁區之後即急步疾走，趕去15號閘口。
因為洗米華真係行得好急，完全冇為意原來Mandy一早已經喺度等佢，幸好Mandy嗌住佢。然後兩人一齊去咗check in，但期間都甚少交談。一個前一個後，洗米華喺前面係咁行行行，要Mandy再嗌住佢，洗米華先至發現Mandy拎住一件好大嘅行李，馬上幫手拎，之後一齊行準備上機去倫敦喇。
洗米華同Mandy坐嗰班機係晚上11點半，洗米華校到11點先到機場，唔係坐頭等都冇呢種待遇呀。