呂志和近年透過銀娛（027）進軍澳門賭業，做得有聲有色，搞到大家差啲唔記得，佢以建材生意起家，並於1955年創立嘉華集團。
嘉華集團為慶祝60周年，陸續舉行唔少活動，其中佢哋喺12月10日開始搞咗個facebook有獎競猜遊戲，幸運兒有機會免費獲贈銀娛旗下澳門酒店嘅住宿一晚，趁住𠵱家澳門賭業吹淡風，順便推銷銀娛嘅酒店，一舉兩得。
不過要中獎其實都唔易，參加者要去嘉華集團facebook專頁玩問答遊戲，答中之後，都要被抽中先得。睇番之前問過嘅問題，都係以香港歷史同嘉華集團呢60年發展里程碑為主題，但有啲都要諗一諗㗎，好似有條問題問，50年代末，呂志和去過日本邊度買韓戰後美軍剩餘嘅軍用機械物資？你知道答案嗎？