呢期華為X2好響朵!7吋全高清平板,八核配3GB RAM,而且仲有雙卡雙待,對應聯通移動等網絡制式,不過最妙係佢粒內置5,000mAh電池,部機一日用唔晒?將佢駁番其他智能裝置,佢仲可以當外置尿袋用,老老實實,當佢隨身後備機,的確唔錯。
肥通雖然係咁諗,不過場內人玩法就唔同,佢哋好多人當正佢手機用,主要貪佢芒大方便睇報價;大家都知場內人用機幾挑剔,但見幾間大舖大佬用佢,都話冇鑊氣,就知冇投訴。不過呢頭講完,即刻就出事!話說華為維修部熱線好䌓忙,好多客話用用吓,忽然打唔出電話,一翻查資料,發現絕大部分都係數碼通用戶,原來數碼通在本月頭忽然將X2定性為平板電腦,所以出現對應問題,所以需要轉用平板Plan先解決問題,而且同GB數只係相差十蚊、八蚊,不過係煩咗啲囉!
講返機價先,X2都出咗大半年,最初水貨三月到港,高開過三千中,近兩月不斷插水,上周開報$2,400,今周進一步下跌至$2,340;預計過埋聖誕可能見$2,200尾,冇計啦!廠價不斷下插,明顯想跑靚條總銷售量。
查詢:麗達屋(深水埗長沙灣道226-242號深之都商場1樓29-30號舖)
記者:朱崇德