摩連奴（圖）被炒，其實並不意外，小弟早在上個月國際賽期前已經覺得「寸王」危在旦夕，不過歐聯仲有啲成績一路拖落去，到聖誕快車前夕先炒，絕對唔係一個好時機。車仔今季戰績下滑原因心照不宣，並唔係球隊實力問題，摩連奴一走就大勝新特蘭，換邊位上去都扭轉局面啦。
最意外摩連奴今次被炒，竟然離開得唔夠型；講真摩連奴又唔係第一次被炒，不過被炒前多次講被球員出賣，就好似潑婦罵街，講真球員係你搵返嚟，佢哋變心真係唔怪得邊個，仲有連走都走得樣衰過人，做咩要用外套掩面箒，你唔係叫雞高官俾傳媒撞破要掩面離開時鐘酒店喎，你兩次都幫車仔贏英超，對得起球會、球員、球迷有餘，無愧於心，點解唔昂首闊步，着住經典灰黑色大衣離開史丹福橋，然後回頭揮手告別呢？
其實隨住費格遜退休、摩連奴被炒、雲高爾落難，亦都反映強勢領隊嘅末日；球員hea踢逼走領隊，好多時都係紐卡素球員嘅技倆，但連車路士都係咁，情況真係一發不可收拾；我都覺得阿巴莫域治係好唔想炒摩連奴，但換過晒十幾位球員易啲，定換一個領隊易啲？球員對教練或領隊稍為不滿就可以發動「工業行動」，視職業操守如無物，難怪拜仁快人一步簽入安察洛堤，因為球壇能跟球員保持良好關係又有好成績嘅教頭真係太少喇。
文：牽牛