剛過去的星期日在美國拉斯維加斯舉行第64屆環球小姐決賽，在最緊張時刻，上演了一幕千年經典撻Q事件。司儀哈維（Steve Harvey）誤把亞軍得主當作冠軍，在他宣佈哥倫比亞佳麗阿雷瓦洛（Ariadna Gutierrez Arevalo）為2015年環球小姐唔到一分鐘，他竟然以十個尷尬嘅表情伴住一把標準司儀聲線作出道歉。向在場、電視機旁及在線遍佈全球嘅觀眾宣佈菲律賓佳麗渥茲巴赫（Pia Alonzo Wurtzbach）才是冠軍。那一刻，有人失而復得，也有人從天堂跌落谷底、比死更難受。
在廣告行，撻Q時時有。話說幾年前，有一位廣告公司高層，去國內某大城市某大廣告公司見工。本來飛去見工，一啲都唔出奇。然而，呢位高層，見工都見得好有派頭。
有人攞住歡迎紙牌企定定喺機場接機，好衰唔衰個歡迎牌除咗寫上必要的姓名外，仲多手寫埋見工的公司名稱。就係六合彩都有得中咁好彩，這位遠赴見工高層嘅更高層又咁啱搭埋同一班機飛去同一個城市仲一齊落機，又真係咁啱撞到佢嘅高層下屬同嗰塊大到唔會睇唔到嘅歡迎牌。你話，此情此景，真係尷尬到呢……想死。
又有一次，有個某大廣告公司GM成日話自己點忙點忙，日理萬機，但工作天下晝總係唔見咗人。佢嘅一個下屬有次吞pop，偷雞下晝走咗去做gym。又真係日頭唔好講人，就喺跑步機跑到上氣唔接下氣之際，從門口走進來的一位中年女士，並非他人，正是佢大老闆GM是也。結果點算？就係兩個都當對方透明，我睇你唔到，你睇我唔到。
再講多一單真人真事。有位外國長大回流做廣告嘅新紮師姐，剛遇上有個job男主角係天王郭富城阿王，扮到靚靚小fan屎嘅佢爭取跑去跟拍攝電視廣告，寶麗萊合照攞簽名嘅指定動作，一定走唔甩。但當阿王簽完個Aaron靚名之際，佢爆咗句：「吓，乜你唔係Louis（古仔古天樂）嗎？」嘩，點呀你，晒得黑黑哋，結結實實就古天樂。咁樣撻Q法，神仙都難救。
文廸晞
mailto:[email protected]