昨日講中國發改委決定不因應國際油價下滑，決定內地成品油價格不變。彭博通訊社係引述美國證券行Sanford C. Bernstein & Co嘅分析師Neil Beveridge嘅研究報告。分析師指中國今年頭七個月嘅汽油消耗量比去年同期增加十點四巴仙，汽車排放量大增，中國當局幾唔想見到呢種情況，故此以油價38美元一桶作為底價，唔肯再減落去。
偏偏石油輸出國組織嘅11月原油生產係三年來最高嘅，十二月四號嘅油組會議中，達不成減產協議，各國各懷鬼胎，係要爭取市場佔有率，不惜減價競爭。呢個世界最大嘅卡台爾組織，多年來串謀定價，違反任何一個先進國家地區嘅競爭法，卒之難敵市場力量，彼此展開真正價格競爭，香港競爭事務委員會應該向此個案學習學習，靠法律難以降低價格，最後都係要睇市場力量。
仲有呀，減價竟然係「壞事」。嗱，美國四十年來為了保護國內石化工業，禁止石油出口，事實上過去四十年美國係石油淨輸入國，要出口石油亦缺乏經濟理由，但有咗頁岩油（shale oil）之後，情況不再一樣，世界石油量生產過剩，石化工業周圍買到平價油，何需保護？故此美國已在十二月十八日撤消禁止石油輸出禁命，令美國環保團體大為不滿。美國油將與中東油、伊朗油在世界競爭，油價因此好難上升，對環保構成一項大挑戰。
中電減電費（其實基本電費微升，燃料調整下調啫），有人話唔夠皮，減得少。實則上，中電以後因應政府要求，一定會不斷減排，減少用煤發電，降低石油發電比例，增加天然氣發電，而三種燃料之中，天然氣最貴。中電與中石油簽訂咗20年天然氣長期供應協議，供應價雖無透露，但以前簽落嘅供應價錢點會平得過今天市價吖，尊重合約精神就唯有啃咗佢；想當年，中電要自建液化天然氣碼頭倉庫（LNG Terminal），向國際市場買天然氣，特區政府不批准，逼中電與中石油簽訂長期西氣東輸協議，明益中石油，今日咪有如此事情囉。目前世界上最多人講嘅，唔係汽油減價，電力減價，而係減排，不惜用貴電（太陽能、風力），香港環保團體應該知道啩。目前全世界嘅可再生能源發電量，只佔全球發電量1.6%，以後不斷要增加比例，係巴黎氣候峰會嘅世界共識，預料世界先進地區嘅平均電費會不斷上升，兩電如不減價，竟然先至迎合世界潮流！