環保係社會大潮流，就連聖誕樹，同樣可以環保方式出現。一批非一般嘅聖誕樹同聖誕裝飾，就喺房屋署多個屋邨湧現，例如藍田安田邨嘅聖誕樹（圖），肯定係別樹一幟，2.4米高嘅聖誕樹主體係用同款膠樽製成，全部係向居民收集而嚟，再配以光碟碎片並利用燈光反射，令聖誕樹出現冰雕效果。而聖誕樹旁嘅可愛鹿車，就係以棄置報紙、木凳、膠樽同雞蛋盒砌成，完全係廢物利用。
房屋署發言人話呀，原來除咗安田邨，元朗嘅水邊圍邨同天耀邨、葵青嘅葵芳邨同石蔭邨、藍田嘅翠屏（南）邨同深水埗麗閣邨等，都採用咗唔同回收物料製作聖誕樹，旨在同居民歡度佳節。