民建聯主席李慧琼連同幾位黨友譚耀宗、葉國謙等一齊去工展會掃貨，成班人一入會場，就俾近入口檔蒸氣燙斗示範吸引。譚Sir、阿謙不禁驚訝一個蒸氣燙斗原來咁多功能，之後自然速速磅，唔好四圍望，齊齊買個返屋企（圖）！
買完燙斗成班人行咗幾檔即食麵攤位，譚Sir知慳識儉，買咗一大袋麵，仲以勝利者姿態同八方講「買麵送鮑魚呀」﹗阿謙就食得健康，買咗幾包非油炸麻油麵。李慧琼就話，家陣立法會成日拉布，又唔想飲咁多咖啡，所以買定啲即沖杏仁茶同果醋，得閒潤一潤。買嘢之餘，佢哋仲試食埋連特首都like嘅Hello Kitty包，不過李慧琼就話唔捨得食，反而佢班黨友就大大啖咬落去。