聖誕佳節臨近，近排中午行過部份商場，都會見到有人企埋一齊報佳音，超人李嘉誠嘅主場──中環長江中心都唔例外，噚日中午有近百人一齊報佳音。最重要係，超人都有路過欣賞，最後仲跟全部人嚟張大合照，睇佢相當精神，佢紅顏知己周凱旋提到佢早前因「腰椎管狹窄症」去美國做手術，睇嚟已經好得八八九九。
講番呢個報佳音活動，聽聞係由長江中心嘅物業管理公司籌辦，廣邀大廈租戶參與，噚日合唱團成員就包括長和（001）同事，仲有租戶高盛、美林嘅ibanker，佢哋識玩樂器就彈樂器，其餘就大展歌喉。
至於報佳音嘅由來，話說耶穌誕生嗰一晚，牧羊人突然聽見天上有聲音發出，向佢哋報耶穌降生嘅消息，天使就通過牧羊人將消息傳開去。後來大家就仿效天使，將耶穌降生嘅消息以此方式傳開去嘞。