郵政署遮蓋全港郵筒皇冠標誌惹全城反彈，點知呢股去殖風竟疑似吹入校園。噚日有英皇書院old boy爆料，指校內有蓋操場一幅皇冠校徽馬賽克，俾校方用掛牆電視機破壞兼遮住，仲話皇冠圖案原意係紀念回歸後被迫去掉嘅舊校徽皇冠，係當年一班舊生夾錢買料整，認為校方今次做法等同侮辱校徽，要求解釋同還原。校長胡美好就話，掛電視係想學生有平台接收最新活動資訊，同建築署及古蹟辦交涉咗大半年，務求唔會破壞古蹟紅磚牆，最後喺皇冠圖案上整係折衷嘅做法，仲話對事件咁政治化係始料不及。