飛達帽業（1100）老闆娘顏寶鈴出名好勤力，凡事都親力親為，每日瞓得4粒鐘，記得幾年前佢曾經講過，唔諗住兩個仔會做接班人，皆因佢哋對呢行冇乜興趣。不過，飛達帽業日前就宣佈，委任顏寶鈴位二公子顏肇翰做執行董事，似乎都係要幫手繼承生意。
根據資料，顏肇翰今年25歲，應該係90後，佢2013年畢業於美國印第安納州西拉法葉市普渡大學，取得經濟學理學學士學位，之後去咗投資銀行工作，舊年底加入飛達，𠵱家升做執董。
顏肇翰基本年薪65萬元，除開一年，每月有5.4萬元，仲未計花紅，以90後嚟講，應該相當唔錯。
佢阿哥顏肇臻畢業於美國匹茲堡卡內基美隆大學，主修資訊管理，今年28歲，2011年加入公司，不過一直做非執行董事。顏寶鈴之前亦提過，大仔𠵱家同朋友搞網上生意，應該有自己嘅事業。