立法會休會無耐，田北俊已經跳出香港，去咗美國睇NBA（圖），仲要係去三藩市，睇上屆總冠軍金州勇士隊主場比賽，勇士今季仲創下NBA史上開季連勝24場紀錄！
田少喺facebook話，自己睇呢場係勇士「復仇之戰」，皆因勇士史上最長連勝紀錄，最近俾另一球隊公鹿隊終止咗，田少睇呢場，就係勇士輸畀公鹿後，雙方首次對戰，結果田少見證勇士成功復仇！
唔少網民見田少現場睇勇士隊比賽，都恨到流口水，但就不忘叫田少記得返港投票，唔好畀網絡23條通過。田少就提醒網民，話明年1月6日先復會！講起復仇，有花生友就留言，話要等梁振英下台，香港人至算復仇成功喎。