留意番，「最衰11人」並非「最佳11人」的相反，指場上表現差的球員，而是指球風、球品「最衰」。如閣下認為球壇有比他們更惡名昭彰者，歡迎討論指正。
門將：舒密加。門將很少衰人，82世盃撞到法國後衞巴迪斯頓失去知覺兼甩咗四隻門牙的舒密加，不幸上榜。
後衞：馬特拉斯、泰利、舒捷夫。馬特拉斯有幾茅不用多提，世界盃「撩㷫」球王施丹成代表作；泰利場上其實冇乜點，但搭上隊友布歷治老婆，「勾二嫂」罪名在男性為主的球迷中係死罪；反而於66世界盃踢傷球王比利的保加利亞後衞舒捷夫，已算「好人」。
中場：堅尼、施蒙尼、雲尼鍾斯、祖爾巴頓。堅尼有幾「堅」，唔問韋拉，問俾佢鏟斷腳收山的夏蘭特都知；施蒙尼就有碧咸做證人；雲尼鍾斯出自「狂人球隊」溫布頓，曾經俾佢「偷桃」的加斯居尼應感受最深；至於練波練到打爆隊友隻眼嘅祖爾巴頓，其爛仔踢法同紅牌紀錄已算小兒科。
前鋒：簡東拿、蘇亞雷斯、迪亞高哥斯達。簡東拿的經典功夫腳，一腳夠佢上榜；蘇亞雷斯係副隊長，mark佢嘅後衞唔知驚佢射術定驚佢棚牙多啲；至於哥斯達，當之無愧係榮譽隊長喇！原因不贅。
想像上述11人同時落場，確係未必有人敢做對手。不過，如果有隊波，位位周薪過萬鎊，為逼走領隊不斷輸波；領隊一走立即搏命贏波，會否才是近期的「最衰11人」？
方栢翹
now足球評述員