雖然今年大家見唔到港產大熊貓BB出世，但海洋公園噚日就傳嚟喜訊，有16個新成員加入呢個動物大家庭，包括一隻印度太平洋樽鼻海豚BB，以及15隻巴布亞企鵝BB。
海豚BB叫做Rati，係男仔，今年9月出生，現由15歲嘅新手媽媽Rita餵哺，預計3年後先會戒奶。公園話Rati性格溫柔文靜，但好奇心爆棚嘅佢已開始探索周圍環境，仲放膽接觸其他海豚，又不時主動撩護理員玩。
至於15隻巴布亞企鵝BB就分別喺11月同12月出世，由父母喺巢內悉心照顧，不過遊客𠵱家已經可以去「南極奇觀」見佢哋一面。小企鵝一般喺60日大開始換毛，預計明年2月就可以見到佢哋水中暢泳㗎喇。