「終於都冬至，一早一晚還是有雨。當初的堅持，現已令你很懷疑，很懷疑，你錯買X股詛咒那貼士」。一年過去，今年新股可以話係橫行無忌、橫風橫雨、散戶高追橫財變破財。
正所謂唔怕生壞命，最怕改壞名，要成為一隻成功嘅新股（乜嘢係成功？睇你企喺莊家定股東角度啦），就要知道改名的藝術。年尾數榜日子又到，今日千頌C隆重頒發「2015年股壇靚名頒獎典禮」！
「擺明蝦你記唔到大獎」
（都唔知有心定無意）
1、FRASER（8366）——呢隻股冠軍實至名歸！由0.2元配股價上市炒到5蚊，短短三日打番落0.25元，神龍見首不見尾，極速成為市場焦點！最勁個point係，嗰幾日聽100個人講呢隻股，但係完全冇人真正知呢隻股個名點讀！極度懷疑隻股個全名係：「隻飛Ser呢……定FrySer…是但啦，總之隻妖股乜Ser啦」。
2、REF（8177）——0.75元配股一日炒上3.79元，呢隻相對冇咁勁，要用14交易日先打回原形。隻股可能好多人賭過，但相信問10個有9.5個人都唔知隻股做盛行，Number易記過個名，REF？ETF？MPF？RMF？總之就係F。
3、紅星美凱龍（1528）——呢隻個名蹺口到爆炸！睇10次都唔記得呢5個字排序。不過呢隻股相對以上均真啲，佢IPO價13.28元，上市後股價從未上過水！冇希望就冇失望，算有人性。
「最Hea改大獎」
1、中國創意控股（8368）——今年中國文化概念股大熱，搞藝術最怕曲高和寡，呢隻嘢有「中國」、又有「創意」，即係搞中國文化！即係做啲乜？唔知，總之有趙薇，完！
2、中國派對文化（1532）——呢隻仲勁！本身業務係做COSPLAY衫，但家陣最當炒係乜？咪就係「中國」、「文化」囉！仲要開埋Party！性感內衣股，改個靚名，就晉身文化產業股，仲要「是中國的」！死未？
「藺常念特約——易容失敗大獎」
新福港（1447）、承達（1568）——排名不分先後！上榜原因：同樣俾藺常念點名狂轟，以前曾以高價上市，然後低價私有化，見市好啲就重施故技，將同一業務上市再招搖撞騙上市抽水。一隻股如果擺明有心易容再搵食，就應多花功夫，一Google個名，就輕易搵到呢兩隻股嘅往績，你睇！咁快就俾人篤爆！失敗！
「越改越霸氣大獎」
正所謂，正人君子，行不改名，坐不改姓。一隻股份突然改名咁古惑……係咪老千股就自行判斷。不過可以好肯定，大家可從中了解呢期當炒咩概念，排名不分先後：
國藏集團（559）改為「德泰新能源」——你睇中國北部霧霾勁到令人窒息，就知新能源係幾咁火熱啦。動感集團（1096）改為「中能國際」——上榜係因為個名，由聯想到「動感超人」，變成似一間走向國際嘅能源界巨企！霸氣度即時Up！七星（245）改為「中國民生金融」——由諗起七星茶，變成一間金融公司，仲要係中國嘅！總之有中國就最勁啦！中慧國際（1143）改為「華夏健康產業」——中慧，唔知佢做乜；華夏健康產業，關注華夏上下五千年文化的健康產業企業！聽到都覺得前途無限！華保亞洲（810）改為「中國互聯網投資」——公司有乜業務？中國、互聯網、投資，講完，買啦！仲問！
「越改越霸氣金獎」
太元集團（620）改為「大唐西市絲路投資」——呢隻股走在潮流尖端！家陣中國講緊一帶一路概念呀，又西市、又絲路，加埋投資，仲唔係投資西方嘅絲綢之路？齋聽都覺得吸引！Sorry，根據11月嘅公佈，易手後嘅公司係就係開始轉型買資產，但買咗堆古幣同茅台返去，呢個新晉收藏家仲順手開心公佈「五供二」㖭！
「最大愛無私大獎」
長和（001）——「1號仔」原本叫長實都還好，一改咗名就同隻市值得21億嘅股仔「長和國際實業」（009）撞到應一應！「1號仔」1月改名「長和」首日，隻「9號仔」無啦啦升一成！相信「9號仔」度名時都富心經營，當日終於成功抽到超人水了！
千頌C
http://fb.com/winbigwok
本欄隔周三刊出