十二月十四日競爭法正式實施，即有貨櫃車司機工會與交通運輸界議員易志明舉行示威，抗議香港油公司賣汽油柴油價高得滯，次次加快減慢，即係話以前國際油價升之時，香港油站好快就加價，但每當國際油價下滑之時，汽油價就減得慢，現在國際期油價格已跌破40美元一桶，在34至38美元之間浮沉，但零售汽油價格好似未曾反映得到噃。
幾間石油公司有冇合謀定價，我哋唔知，現在有咗競爭事務委員會之主席胡紅玉鼓吹商界職員告密，或者佢哋有辦法搵到油公司高層願意違反公司保密協議都唔定。左丁山只係想從另一個角度看問題。
本欄寫過低油價害環保，最近前地政署署長劉勵超在信報專欄講電子道路收費，認為有必要，因為佢從政府數字得悉，本港私家車註冊數目不斷上升，導致道路擠塞，碳排放上升，政府維持高油稅（佔入油價一半以上）及高汽車首次登記稅有其必要，寓禁於微嘛。香港之汽油稅及汽車首次登記稅已經係世界最高之列，特區政府要再加，大概都會覺得唔好意思，由此引申，假如汽油價格大跌，揸私家車之人咪仲會不斷增加？咁講法，競爭事務委員會及消費者委員會如果諗辦法去壓低汽油價，簡直係同環境局作對，黃錦星一定唔贊成。
油價愈低，愈難保證減排，香港人人有權講嘢，爭論不休，目前油價企硬好吖，還是逼汽油價下跌好呢？中電港燈嘅燃料費向下調，令電力減價，議員們與環保團體一致斥罵唔收貨，要兩電減價更多，就係基於膝頭即時反應，逢加必罵，逢減必好，減得愈多愈好嘅民粹心態，普通人如此，不足為奇，但環保團體也如此就見得其膚淺。中國發改委就好嘢嘞，在國際油價大跌之時，決定不向下調整內地成品油價格，變相保障中石油、中石化、中海油等大國企嘅利潤，難怪有內地網民不滿。但外國分析師就睇深一層，彭博指中國不減成品油價係向石油國輸出組織（OPEC）發出訊號，油價已經跌到殘，跌夠嘞，中國唔會跟風，一於維持內地油價不變，以免鼓勵汽車多消耗汽油及藉此抑制碳排放。中國發改委以宏觀角度睇油價，為咗減排，一於不准油價再跌，香港特區政府梁振英、黃錦星、張炳良等能否心領神會，緊跟國情？