今年69歲嘅聶安達（Anders Nelsson），除咗係資深音樂人同藝人之外，其實仲係聖誕老人！原來佢10年前開始扮聖誕老人出席各大小活動，扮咗起碼過百次，堪稱得上係扮聖誕老人最多嘅藝人。
忍淚最難
聶安達噚日喺電話度話：「10年前美國商會有個慈善活動搵我扮，跟住Sam Hui（許冠傑）太太就介紹我做義工（麥當勞叔叔之家），喺每一年聖誕party扮聖誕老人，呢個party好感動，見到啲患病嘅小朋友，我要忍住喊，要好開心。」不過，聶安達話上星期喺太古城幫一個慈善活動扮聖誕老人時就差啲失手，佢話一位智障小朋友攬實佢話：「Santa，I love you so much！」感動到佢幾乎標眼淚，要即時中止活動唞一唞。
4歲就由瑞典移居香港嘅聶安達，唔單止愛錫小朋友，對長者亦相當關心，佢話早排睇到老人家喺護老院受到虐待，直情嬲到震，而今個月31號，佢會喺中環嘅Grappa's Cellar舉行慈善演唱會，幫香港防止虐待長者協會籌款。
撰文：馮仁昭