葉念琛盛產愛情戲出晒名，聖誕節就有套《紀念日》上映，話要總結自己拍咗10年愛情電影！其實佢初期執導嘅《獨家試愛》三部曲口碑唔錯，成功建立咗個人風格，但點解後來會被網民冠以「MK活地阿倫」稱號？動新聞總結咗葉導電影7個重點，話你知點解睇佢一部戲，已經可以知晒其他幾套戲講乜。
1.阿寶阿寶
只要有留意葉念琛嘅戲，就一定聽過「阿寶」。由《獨家試愛》、《十分愛》、《我的最愛》、《保持愛你》、《婚前試愛》、《人約離婚後》、《天生愛情狂》、《第一次不是你》、《Delete愛人》到今年嘅《紀念日》，都有個角色叫「阿寶」，而絕大部份時間「阿寶」都係女主角。
2.永遠男女主角
你可能分唔到葉導啲戲，不過凡係有Stephy小方嘅戲，你都幾乎可以肯定係葉念琛執導，三個人已經劃上等號。
3.第三者
愛情片少不免係要有分手情節，但點解每套都關第三者事？
4.分手
分手只係公式入面嘅一個階段，放心，男女主角係一定會復合嘅。
5.兵哥
通常男方出軌後，「阿寶」身邊就會有個識晒琴棋書畫嘅專一男突然出現，守候喺附近，但「阿寶」始終會心繫男主角。
6.復合
好喇，兩個終於都知大家先係一生中最愛，連串質問，攤牌，原諒，但未完㗎！
7.大師金句
最後5分鐘至係精華，男女主角表面恩愛，但其實仲係會收埋啲秘密，甚至繼續出去偷食，完全推翻晒所有女人對愛嘅憧憬，咩happily ever after都係假嘅！睇一次係幾新鮮，但套套都係差無幾，最後呢？咪俾網民封為「MK活地阿倫」囉！