講到大劉，自然想起大劉經常幫襯嘅「富豪飯堂」福臨門，福臨門做開有錢人生意，即使今年經濟轉趨疲弱，斷估有排都未影響到一班富豪嘅消費水平。福臨門第三代掌舵人徐德強（Duncan）都話，今年整體生意跟舊年差唔多，噚晚做冬，依舊全場爆滿。
Duncan話，近年大家注重環保，減少食魚翅，加上𠵱家天氣凍凍哋，做冬多數叫窩蛇羹（例牌4位用要1,300元），再加乳豬、魚、雞等等，普通一餐嘅人均消費大約800蚊，同舊年差唔多，如果要叫鮑魚、海參當然另計。
佢話，過時過節嘅生意通常唔會太差，噚晚佢哋自己一家人喺番福臨門食飯做冬，因為俾客人訂晒啲枱，佢哋就喺電梯大堂附近搵個位置，擺張大枱食飯，不過呢件都係開心事，有人幫襯最緊要咁話。