憑無綫經典劇《大時代》於今年4月強勢復出的「大佬孝」邵仲衡，工作已排到明年，他將於下月14到17日在尖沙嘴文化中心演出改編自人氣漫畫《火鳳燎原》、共6場的舞台劇《火鳳燎原之亂世英雄》，邵仲衡飾演呂布，喇英扮演張遼，而郭鋒則演陳宮。
51歲的邵仲衡將挑機30歲的喇英，他們前晚在觀塘綵排動作場面。邵仲衡熱身時做sit up，幾乎將身體對摺，柔軟度極高，喇英就晒一字馬。邵仲衡和喇英練習拳頭交戲，喇英踢腿，邵仲衡出臂力擋，之後邵仲衡更乘勢叉頸，令喇英動彈不得。另外，邵仲衡還紮馬，讓喇英用其大髀借力做側手翻，動作利落。邵仲衡在綵排其間，突走到沙發倒豎葱，他表示這招是半百男人防脫髮的秘密：「得閒倒吓，血運行到腦，行得好就唔會甩頭髮。」
喇英看到邵仲衡身手後即淆底：「佢會打死我，我真係好驚。」邵仲衡即抵死回應：「腎上腺加劇，控制唔到，睾丸同腎上腺係難以控制兩樣物質。」喇英爆邵仲衡經常恃老隱藏實力，邵仲衡解釋當年在無綫拍古裝劇，就練出食過「夜粥」的身手。
「有呼風喚雨嘅感覺」
邵仲衡又指參演舞台劇過足戲癮：「同觀眾好互動，你可以控制佢幾時笑同喊都得，有呼風喚雨嘅感覺，又似行鋼線，冇得NG。」據知此劇成本逾百萬，為解決舞台劇場地局限，導演將會利用動畫作背景配合，令觀眾跟演員一齊走入漫畫世界。
採訪：陳杰
攝影：沈健程
