外資大行一年前預測，恒指2015年底收爐價介乎25000點至27600點。話咁快就到咗2015年底，將恒指現水平同去年嘅預測作比較，不難發現大行全部都過份樂觀。
雖然大行畀出嚟嘅恒指預測目標價唔多準確，但又唔係全無參考價值，識得用其實都可以好好用。
筆者嘅經驗係，當多間大行都一致睇升或睇跌某項資產，咁呢項資產短線而言，上升或下跌嘅機會頗大，但通常亦代表睇升或睇跌嗰樣資產嘅市場情緒已經過熱，意味唔使幾耐，其升勢或跌勢就會行完。上述情況唔單止係恒指，其他資產亦如是。
預測投資情緒
換言之，大行目標價某程度上亦係一項投資情緒指標，甚至可以話係一項相反指標（contrarian indicator），提醒你資產價格走勢係咪快要逆轉，之前做落嘅好倉或淡倉，平倉時間是否已經來臨。
咁大行預測除咗作為投資情緒指標之外，係咪就完全冇其他參考價值呢？筆者又覺得唔係，的確有啲分析師見個市升緊就睇升，跌緊就睇跌，但亦有個別大行分析師，有能力較同儕更早一步，準確地預測某項資產嘅升跌，只係當幾乎所有大行都變得一致地睇好或睇淡某項資產，先係散戶要小心嘅時間。
今時今日，好多傳媒都有報道大行的報告內容，一般散戶要從網上取得大行分析並唔難。
問題係大行可以一次過畀出幾個目標價，又可視乎市況，隨時三幾個月上調或者下調恒指的目標價。對於呢啲目標價，散戶認真便輸了。
El.
本欄逢周二、四、五刊出