人稱民望高嘅食衞局長高永文，之前喺一場「歡樂跑」賽事俾小朋友絆倒，額頭、顴骨、嘴唇都傷晒，有啲位仲要縫針㖭，八方嗰日見到佢血流披面，一啲都唔歡樂，個心仲離一離咯。佢唞咗兩個禮拜之後，噚日終於復工，雖然塊面有啲傷口仲一撻撻，未完全回復昔日斯文靚仔樣，但精神都唔錯，可以開開心心過聖誕咯。
休息咗一輪嘅民望高，精神面貌好番好多，噚日企定定畀八方任影唔嬲。雖然右邊面仲係有啲傷，額、眼皮、顴骨仲係有痕，鼻骨頂有撻痂，但左邊面依舊好滑溜。民望高話要多謝當日歡樂跑嘅主辦單位、聖約翰救傷隊同北區醫院人員嘅悉心照料，先好得咁快，仲話自己休養期間，都好關心時事㗎。
冇信心今屆搞掂醫保
早前食衞局常秘袁銘輝話，呢屆政府趕唔切為自願醫保立法，要改用行業協議，民望高被問到自願醫保可唔可以如期喺今屆政府落實時，佢直認冇絕對信心，但就話喎，政府同保險業界人士已經傾到「成熟階段」，希望盡快有共識，又話自願醫保只係成個醫療改革嘅一部份，政府嚟緊會採取措施，包括擴充私院床位、增加私院收費透明度等等。
民望高今次見傳媒，足足見咗10分鐘有多，雖然精神算係不俗，但佢講嘢時冇乜中氣，似乎唔多在狀態，唔知係咪未唞夠？亦令一貫楚楚可憐嘅佢更加我見猶憐咯。
李八方
mailto:[email protected]